जालना : जालना जिल्ह्यातील परतूर येथे प्रसिद्ध किर्तनकार निवृत्ती देशमुख उर्फ इंदोरीकर महाराज यांच्या यांच्या गाडीचा अपघात झाला आहे. सुदैवाने इंदोरीकर महाराज यातून बचावले असून या अपघातात चालक जखमी झाला आहे. हा अपघात काल, बुधवारी रात्री दहाच्या सुमारास घडला.
याबाबत माहिती अशी, जालना जिल्ह्यातील खांडवीवाडी येथून किर्तनासाठी जात असताना परतूर येथे एका वळणावर त्यांच्या स्कार्पिओ गाडीची लाकडाची वाहतूक करणाऱ्या ट्रॅक्टरला धडक बसली. यात चालक जखमी जखमी झाला. या अपघातात इंदोरीकर महाराजांना कुठलीही इजा झाली नसल्याची माहिती मिळाली आहे.
अपघाताची माहिती मिळताच परतुरचे पोलीस निरीक्षक शामसुंदर कौठाळे यांच्यासह पोलीस कर्मचारी शाम पांढरपोटे, नरेंद्र चव्हाण, दीपक खरात घटनास्थळावर दाखल झाले. जखमी चालकाला पोलिसांच्या मदतीने शहरातील अस्थिरोग तज्ञ डॉ.सत्यानंद कराड यांच्या सिटी हॉस्पिटलमध्ये दाखल करण्यात आले. अपघात स्थळावरून इंदोरीकर महाराज यांना दुसऱ्या वाहनाने खांडवीवाडी येथे पोचवण्यात आले. या ठिकाणी त्यांचे किर्तन नियोजित वेळेत पार पडले.
